NATIONAL – Ginmaduhan ni Presidente Ferdinand Marcos Jr. an mga ahensya han edukasyon, kapulisan, ngan lokal nga gobyerno nga pakusgon pa an mga pamaagi para han katalwasan han mga estudyante mahuman an sagunson nga madugo nga panmusil ngan trahedya ha pira nga eskuylahan ha nasud.
Ha iya bag-o nga vlog, ginyakan han presidente an mga insidente ha mga eskwelahan lakip an panmusil ha Tacloban City, an panmuno ha Cavite, ngan an pagkamatay han duha nga atleta han Ateneo ha Aurora nga nagdurot hin kasakit ha kasingkasing han kadam-an.
Sumala kan Marcos Jr., basar han mga inisyal nga report, dako an tsansa nga hinungdan hini nga mga panhitabo in bullying ngan mga tago nga problema nga gindadara han mga kabataan yana.
Mahitungod hini, nanawagan an Presidente ha mga kag-anak nga mag-alutaga hira hin oras nga kaistoryahun ngan tagan hin atensyon an ira mga anak agud maproteheran hira tikang ha mga peligro.
Nagpahinumdom gihapon hiya ha mga magturutdo nga bantayan an mga estudyante ha sulod ngan gawas han classroom, samtang gin-aghat naman niya an mga kabataan nga diri maalang o maawod pangaro hin bulig kun may-ada hira mabug-at nga gin-aagian ha kinabuhi
