Dire makikialam hi President Ferdinand Marcos Jr. ha gindumara nga imbestigasyon kasumpay ha maanomaliya nga flood control projects.
Sumala kan Palace Press Officer USec. Atty. Claire Castro, mayda na ginbug-os nga Independent Commission for Infrastructure (ICI) an Presidente nga amu an nakatutok agud imbestigahan an nasabi nga istoryahon.
Ginbuhat han Palace official an pahayag han mapakianhan kasumpay ha pagkakadabi han ngaran han patod han Presidente nga hi anay House Speaker Martin Romualdez ha pagdungog ha Senate Blue Ribbon Committee kun diin nahingaranan ha testimonya an anay security aide ni Ako Bicol Party List Representative Elizaldy Co nga hi Orly Guteza, nga nagdudul-ong daw han mga maleta nga mayda sulod nga milyon-milyon nga kantidad hin cash ha balay han anay House Speaker.
Dinhi, utro nga iginduon ni USec. Castro nga karuyag han presidente nga kinahanglan mayda maipakita nga ebidensya an ngatanan han malutaw nga testigos ha anomaliya ha nasabi nga mga proyekto agud magamit ha korte.
Gin kwestyon gihapon han opisyal an pagigin lehitimo han affidavit ni Guteza mahuman nga gumawas an report nga igindiwara han usa nga abogado an pag-notaryo niya ha nasabi nga affidavit.
