BARUGO, LEYTE – Usa nga patay nga lawas an natad-an hin usa nga residente ha salog han Barangay Pikas, Barugo, Leyte.
An nakakita han patay nga lawas in hi alyas Chad, 35-anyos an pangidaron, paru-pananggot, ngan residente han nasabi nga barangay.
Ginkilala naman an patay nga lawas kan alyas Vic, 68-anyos, ngan residente han Brgy. San Isidro, Tunga, Leyte.
Sumala kan Barugo Municipal Police Station Chief of Police, PMaj. Darwin Dalde, nakakarawat hira hin tawag tikang ha One Command Center han Barugo kasumpay han panhitabo kun diin dayun naman ine nira nga gin respondehan.
Pag-abot han mga otoridad ha nasabi nga lugar in didto nakit-an an naka-kulob nga patay nga lawas han biktima harani ha pangpang han salog.
Sumala han mananggite, samtang tikadto hiya han iya sanggutan in napansin niya an patay nga lawas nga dayun naman ine nga igin pahibaro ha mga opisyal han barangay.
Ha inisyal nga panginano han patay nga lawas, waray naman ine tinigbasan, pinusilan, o anu pa man nga ginamitan hin pwersa, pero nag-request la gihapon an mga kapulisan hin SOCO team para han pagkasigurado.
Nahibaruan naman nga an biktima in dida pa ngay-an urhi nga nahikit-an han Hunyo 1 han kulop ngan nakadto ine ha usa nga patron ha Barugo.
Subay ha mga nakakita, mayda ine gin updan nga sangkay nga senior citizen na gihapon kun diin gin updan han biktima ine nga iya sangkay pag-uli haira, ngan dida an mga ine umagi pag-tabok ha may salog, kun diin kahuman pagdul-ong han biktima ha iya sangkay in daw nagdesisyon ine nga mabalik hiya ngadto han patron, ngan amu na adto an urhi nga kakit-e han biktima.
Ha resulta han panginano han SOCO, waray nahikit-an nga anuman nga rason nga makakapatay han biktima o foul play, labot nala ha pilas hine ha may agtang pero sumala han taga-SOCO, waray man crack ha bungo hine
Posible naman daw nga natumba o nahibalinas an biktima rason han kahimalmal hine ha mga bato.
Ha kaluyo han resulta in nagdesisyon la gihapon an pamilya han biktima nga magdumara hin autopsy examination ha lawas han biktima para ha pagkasigurado.
