TACLOBAN CITY– Padayon an ginhihimo nga imbestigasyon han kapulisan kasumpay ha nadiskubrehan nga patay nga lawas hiton 10 -anyos nga Grade 4 student, ngan residente han Sitio Capayas, Brgy. Bunga, Cabucgayan, Biliran.
Subay ha salaysay han kag-anak, nagsarit la ine nga mananantik hiton tamsi, ngan nahipausa an iya nanay matungod nga waray na ine makauli ha mao nga adlaw.
Sanglit han Nobyembre 16 in nag-aro na hin bulig an kag-anak hine ha kapulisan agud nga maasisteran hira ha pamiling ha nasabi nga biktima.
Natad-an naman an patay nga lawas kakulop nga adlaw Nobyembre 17, ha ilarom hiton puno han kawayan ha Sitio Capayas.
Sumala kan, PCpt. Ruel Sitoy, Acting Chief of Police, Cabucgayan Municipal Police Station, nadiskubrehan nga an bata nga mayda samad ha iya ulo, ngan sugadman bun-og ha iya tuo nga mata.
Dugang pa hine, dire naman nira gintatangal an Angulo nga mayda foul play matungod ha nakit-an nga samad ha ulo han biktima.
Nagpatapod naman ine ha ginbayaan nga pamilya han biktima, nga hihimuon nira an ngatanan agud nga mapagbaton an nagpapaluyo han krimen, ngan matagan hin hustisya an pagkamatay han biktima.
