TACLOBAN CITY – Usa nga parag-uma an ginpanmumusil-patay ngan ginpugutan pa hin ulo ha Brgy. San Francisco, Gandara Samar.
Sumala kan PCapt. Ruel Cantillas, Chief of Police han Gandara MPS, ginkilala an biktima nga hi Christopher Wahingon, 34 anyos an pangidaron ngan residente han mao nga lugar.
Ginkilala naman an pira ha mga suspek nga hira alyas Obet, Jomar Diaz ngan lima nga iba pa nga kalalakin-an nga mga suspek nga waray pa kakilal-i.
Subay ha imbestigasyon han mga kapulisan, pumakadto an biktima ha iya umhanan ngan ha mao nga adlaw gihapon in nasipatan an pito nga mga armado nga mga suspek ha ira barangay nga tikadto gihapon ha direksyon han umhanan han biktima.
Mahuman ini in nabatian an sunod sunod nga buto hin pusil ha mao nga lugar.
Ha sumunod na nga adlaw nakit-an an patay nga lawas han biktima harani ha usa nga sapa pero pugot na an ulo hini.
Mahuman an operasyon han mga kapulisan in waray la gihapon kakit-i an ulo han mao nga biktima.
Narekober ha crime scene an upat nga basiyo hin 5.56 mm calibre nga pusil.
Ha pagkayana in padayon naman an gindudumara nga imbestigasyon han mga kapulisan kun diin usa ha mga ginhihingita nga motibo ha mao nga krimen in mahitungod ha personal nga delito o away.
