MATAG-OB, LEYTE – Patay an usa nga parag-uma ha Sitio Saay Brgy. Mansalip, Matag-ob, Leyte mahuman nga pagbun-on han iya igkasi la gihapon parag-uma.
Ginkilala an biktima kan alyas Jomel, 36-anyos an pangidaraon, samtang an suspek naman in hi alyas Tata, 39-anyos, ngan parehas residente han nasabi nga lugar.
Sumala kan Matag-ob Municipal Police Station Duty Investigator, PMSgt. Marvin Park, may-ada na gidaan nga dire pagkakaintindihay an duha ugsa pa an panhitabo.
Subay han imbestigasyon, parehas naka-inom hin makahurubog nga irimnon an suspek ngan biktima kun diin umuli daw an suspek ha ira balay ngan nagsarit ha iya live-in partner nga manananggot hin lubi ngan kahuman mananakop na hin baki o pakla ha bukid.
Kahuman hine in umuli pa an suspek ha ira balay nga harani la ha sapa nga gin pandukapan hine hin baki.
Ha nasabi nga sapa in nagkatapo an suspek nga biktima kun diin ginlawagan daw han biktima an mata han suspek, pero gin saway ine han suspek mahitungod nga masilaw. Waray naman daw bumali an biktima sanglit nagbinagulbol an suspek, kun diin ha iya pagbinagulbol in ginsundan ine han biktima ngan kapot daw hine an sundang.
Pagkita han suspek nga kapot hine an sundang in naghuna-huna ine nga titigbason hiya sanglit gin unahan na niya an biktima nga gin agaw an sundang, rason nga nagpan-agaw an mga ine. Dida han kaagaw han suspek han sundang in dayun hine nga pinanmuno an biktima ha magkaduru-dilain nga parte han lawas hine.
Sumala naman han suspek, nabuhat niya an krimen mahitungod han self-defense.
Nag-angkon naman hin binun-an ha may tiyan, tu-o nga dughan, li-og, ngan ha may braso an suspek.
Samtang, mahuman an krimen an dumiretso daw an suspek ha Brgy. Hall han nasabi nga barangay ngan nag-surender ha Chief Tanod han lugar dara an sundang nga ginamit hine ngan didto na gin-aresto han kapulisan.
Ginpasakahan naman an suspek hin kaso nga murder.
