TACLOBAN CITY – Ginpahibaro han opisina han City Registration Office han syudad han Tacloban nga abilable na an panrehistro han mga octogenarian senior citizens o adton 80-anyos pa-igbaw an edad nga waray pa rehistro o birth certificate.
Nagkamay-ada gudman hin bag-o nga memorandum an Philippine Statistics Authority kasumpay ha panrehistro han mga ine ngan mahitungod na gihapon han mga benepisyon nga pwede makarawat han mga kalagsan.
Sumala kan Tacloban City Registration Officer IV, Karren D. Kempis, pwede bumisita ha ira opisina an mga kalagsan mga waray pa nga birth certificates agud matagan hin kinahanglan nga dokumento para makakuha han nasabi nga sertipiko.
Para han mga kalagsan nga karuyag magparehistro in kinahanglan la pumakadto ha opisina han CRO ngan magdara hin baptismal certificate ngan marriage contract.
Para naman hadton mga igpapa-rehistro nga namatay na in kinahanglan la nga dad-on han magpaparehistro an death certificate han namatay.
Sumala pa kan Kempis, an mga rekisitos nga gin aaro ha mga kalagsan in igpapadara han ira opisina ha PSA Central Office agud mapangino kun tinuod nga 80-anyos o sobra pa an edad hine nga mga benepisyaryo ngan agud matagan gihapon han ira kaangayan nga benepisyo.
Ha lain nga bahin, kumarawat na han ira cash gift an mga milestone-age senior citizen han syudad durante han gindumara nga aktibidad nga pinangunahan han National Commission of Senior Citizens (NCSC), kun diin kumarawat hin tag-P10,000 an mga octogenarians ngan nonagenarians.
Samtang, duha naman nga centenarians an kumarawat hin tag-P100,000 tikang ha gobyerno. (via Bombo Niña Magpili)
