TACLOBAN CITY– Ginpasamwak hiton Tacloban Business Permit and Licensing Division ha publiko partikular na adton waray pa makagpa-renew han ira mga business permit nga mag-asikaso na an mga ine matungod gin-tagan hira hin extensyon.
Sumala kan Gemmafiel Gaspay,Head Business Permit and Licencing Division Tacloban City, gin-extend nira an adlaw hiton pan- renew kutob ha Enero 31, 2026.
Dugang pa ni Gaspay, usa gihapon ha ira ginbasehan in matungod ha panawagan han pira nga mga business owners nga tagan pa hira hin pira ka-adlaw agud nga makag-asikaso hiton mga dokumento sugadman makagtirok hiton igbarayad.
Ha pagkayana, ada pala ha 60% an datos para han nakagpanbayad na han ira mga business permit ha syudad.
Ginpaangbit naman ni Gaspay, nga dire naman nakaka-apekto han panrehistro adton mga namagsarado nga establisyemento, matungod nga ugsa mahuman an tuig 2025 sobra 1000 nga mga businesses an namag-abre ha Tacloban.
Nanawagan naman ine ha publiko, nga abre an ira buhatan alas 8-5 hiton kulop kada adlaw, magin an 3 nga satellite offices.
