TACLOBAN CITY – Gintikangan yana nga adlaw han Schistosomiasis Hospital ha bungto han Palo, Leyte an panbakuna kontra COVID-19 ha mga empleyado hini.
Sumala kan Dr. Janice Capoquian, Infection Control Committee Chairman han Schistosomiasis Hospital, ha maabot 534 nga mga empleyado han ira ospital, 420 ha mga ini an eligible nga maturukan han Chinese-made vaccine nga Sinovac nga umulpot ha rehiyon han naglabay nga semna.
Pira manggud nga mga empleyado han Schistosomiasis nga nag-eedad 60 anyos paigbaw in dire na pwede nga maturukan hin bakuna ngan an iba naman in may mga comorbidities nga gin-aabat.
Mayda gihapon pira nga mga empleyado nga bumaribad nga magpabakuna han Sinovac tungod nga mayda pa hira ginhuhulat nga iba nga klase o brand hin bakuna nga asya an ira karuyag nga igturok ha ira.
Yana nga adlaw in maabot ha 100 nga mga empleyado han mao nga ospital an nabakunahan na kun diin syahan nga nagpaturok hi Dra. Agnes Aliposa, chief han Medical Center Staff han Schistosomiasis.Nahibaruan nga agud nga tagan hin iwag an vaccination rollout ha mao nga ospital, temporaryo la anay nga ginpasaradhan tikang yana nga adlaw tubtob hiton Marso 10 an Outpatient department-maternal and neonatal care unit hini.
