TACLOBAN CITY – Gin pasabot han Tacloban City Hospital an pira nga pamaagi agud malikayan ngan mahibaruan kun mayda an usa nga indibidwal sakit nga breast cancer.
Gin-aghat naman han nasabi nga hospital an mga kababayen-an nga proteheran an ira mga kalugaringon pinaagi han healthy living ngan paglikay ha mga processed foods.
Sumala kan Tacloban City Hospital Chief, Dra. Gloria Fabrigas, mayda pipira nga sintomas an makakagtudlok agud mahisabtan kun an usa nga indibidwal in mayda breast cancer.
Syahan, kun an babaye in mayda mahihiram nga bukol ha iya may dughan in posible nga cystic o nojul. An nojul in usa nga klase hin bukol nga matig-a ngan dire nakikiwa. Nahimumutang ine ha upper outer quadrant han suso ngan ine in dire maul-ol kun nasasabod.
Ikaduha, kun mayda cancer history an pamilya.
Ikatulo, kun mayda kakaiba nga discharge ha nipple sugad han nana o dugo.
Ikaupat, pag-ubos han timbang bisan kun dire nagda-diet an usa nga babaye.
Ikalima, dire maupay nga bowel movement.
Ngan ikaunom, an pagkakamay-ada hin mga pasa ha lawas.
Samtang, gin aaghat naman ni Fabrigas an mga kababayen-an nga regular nga magpa-check-up ha ira mga doktor kun mayda gin aabat nga kakaiba ha ira mga lawas agud mahibaruan hin timprano an mga sakit ngan matagan hin sakto nga atensyon-medikal an mga sintomas nga gin aabat. (Bombo Niña Magpili)
