PALOMPON, LEYTE – Gin baton ni Palompon, Leyte Mayor Mary Dominique Oñate an public statement ni Leyte 4th District Representative Richard Gomez ha pagduduso hini ha Department of Environment and Natural Resources (DENR) Region 8 nga ig rehabilitate ngan himuon nga protected area an Palompon Watershed Forest Reserve (PWFR) agud mapugngan an nagtitikagrabe nga kondisyon ha polusyon ngan forest loss nga padayon nakakaghatag hin kadelikadohan ha ecological balance ha lugar.
Sumala pa hine, waray mamati hin maupay hi Gomez han igin presenta nga statements ngan datos han Department of Environment and Natural Resources (DENR) mahitungod nga ha igin pakita nga datos han DENR in umabot la ha 45% an Re-Protected Areas Suitability Assessment (REPASA) han nasabi nga lugar, harayo ha 80% nga passing rate nga kinahanglan agud mahimo an usa nga lugar nga protected area.
Usa ha mga gin bibiling nga datos ni Oñate kan Gomez in an magpapakita nga an kawara han ‘fauna and flora’ ha Palompon Watershed Forest Reserve an rason kun kay ano nakakahugaw ini ha Ormoc Bay.
Dugang pa ni Oñate, diri imposible nga an nakakaghatag la gihapon hin kahugaw ha Ormoc Bay in an mga residente han syudad, diri an PWFR han Palompon ug Matag-ob.
Subay pa kan Oñate, dida han tuig 2021 in igin pasa an suitability assessment kun diin, basar ha Presidential Proclamation in diri suitable nga mahimo nga protected area an PWFR pero ha kaluyo hini, in waray hugawi han Palompon ngan Matag-ob an tubig ha mao nga area, lugod usa ini ha mga source han tubig han nasabi nga lugar kun diin 30,000 nga mga residente an natatagan hin supply han mao nga tubig.
Sumala kan Oñate, kun may-ada kamatuoran nga gin huhugawan an PWFR in may-ada na unta kaso han water-borne diseases tikang ha mao nga area nga gin kukuhaan hin tubig.
Ginduon pa hine nga gin hihimo la nga politika ni Gomez an pagduduso nga mahimo na protected area an mao nga lugar agud maipasara an usa nga negosyo mahitungod nga waray pa ini nahihimo kumo Congressman. Dugang pa hini, gin-aatake ni Gomez an mga munisipalidad nga diri kaalyado agud matabunan an mga ghost flood control projects hini.
An PWFR in nahihimutang ha mga munisipalidad han Palompon, Matag-ob, ngan Villaba nga may-ada total land area nga 5,653.57 hectares. (via Bombo Niña Magpili)