METRO MANILA – Nakakarawat hin pagbaribad tikang ha magkadurudilain nga labor groups an pormal nga pagpapatuman dida han Marso 9, han 4-day workweek ha mga ahensya han gobyerno, kaupod na an mga korte ha nasud.
Sumala ha mga grupo han empleyado, dire an polisiya an tinuod nga solusyon ha krisis, ngan ini in magdudurot la hin kalbaryo ha haros 1 milyon nga job order (JO) ngan contract of service (COS) workers han gobyerno.
Gineksplikar ni Santiago Dasmarinas Jr., presidente han Confederation for Unity, Recognition and Advancement of Government Employees, nga aada ha ilarum han no work, no pay policy an mga JO ngan COS, sanglit hira an duro nga naapektaran ha pag-iban hiton adlaw ha trabaho.
Kumo alternatibo, ginsushestyon ni Dasmarinas an temporaryo nga pagtanggal ha excise tax ha petrolyo ngan value-added tax ha mga pangunahon nga papliton ngan serbisyo.
Nagpahayag gihapon an Kilusang Mayo Uno kun diin, ginmalatumat hini nga magdadara hin double o triple nga kapoy ha mga empleyado an posible nga 12-hours nga trabaho kada adlaw.
Samtang, ginduon naman han Trade Union Congress of the Philippines (TUCP) kan Presidente Ferdinand Marcos Jr. nga sertipikahan nga urgent an P200 wage hike ngan igmando an paghahatag hin emergency cost-of-living allowance.
