TACLOBAN CITY – Nakasentro yana an atensyon han Samar Police Provincial Office (SPPO) ha pagpuypoy han mga loose firearms ha Calbayog City.
Ini mahitungod han hitaas nga crime incidence ha natura nga syudad.
Sumala kan Police Senior Supt. Nicolas Torre III, Provincial Director han Samar Police Provincial Office, an ira kampanya ha pagpuypoy han mga loose firearms ha Calbayog in waray kalabutan ha pulitika.
Ini daw in base ha kamatuuran nga hitaas an ihap han mga shooting incident dinhe kon pagsusubayon an crime map han natura nga syudad.
Mababaruan nga daw ginkokonsidera ni Mayor Ronaldo Aquino hi Torre kumo ‘surok’ kan Samar Governor Sharee Ann Tan, kalaban ha pulitika han natura nga alkalde.
Kon manunumduman una na nagpasa hin resolusyon an Calbayog City council nga nagdedeklara kan Torre kumo ‘persona non grata’ mahitungod han daw involvement hini ha mga politikal nga aktibidad ha probinsiya han Samar.
Sumala kan Torre nga ginbubuhat la niya an iya trabaho agud maibanan an kriminalidad ha syudad han Calbayog ngan diri hini ginpe-personal hi Mayor Aquino.
Dugang pa ni Torre nga hitaas an krimen ha natura nga syudad mahitungod nga ikatulo ini nga pinakahiluag nga syudad ha bug-os nga Pilipinas pero mayda la 100 nga kapulisan nga naka-assign ha lugar.
Mababaruan nga dida han nakalabay nga Agosto 14, narekober han mga kapulisan an iba-iba nga mga loose firearms ngan ammunitions durante han pagserbi hin search warrant tikang ha panimalay han anay mga kapitan han Barangay Patong Calbayog City nga hira Jornito ngan Sonny Tegra.
Samtang gin-iimbestigaran pa kon kay anu nga nagtatago hin iba-iba nga kalibre hin pusil an anay mga opisyal han barangay.
