NATIONAL – Gintalapas han China an kasarabutan hini ha Pilipinas dida han 2012 ha pamamaagi han pagpapadara han barko nga pangyera ha may Scarborough Shoal dida han nakalabay nga Lunes, Agosto 11.
Ini an ginpahayag ni Armed Forces of the Philippines chief General Romeo Brawner Jr. ha mga tinaglawas han media.
Gineksplikar han AFP chief nga mayda kasarabutan an Pilipinas ngan China nga tanggalon an mga Navy ship tikang ha lugar. Sumunod dinhi an Pilipinas pero yana in ginbalik han China an barko nga pangyera han People’s Liberation Army – Navy.
Manunumduman nga dida han 2012, naipatuman an kasarabutan ha butnga han Pilipinas ngan China mahuman an pira ka-bulan nga standoff han mga barko han duha nga nasud ha mao nga shoal nga naghuman ha pamamaagi han patapod han magkaluyo nga panig nga pag-atras han ira mga barko.
Samtang, nakikita naman ni Gen. Brawner an insidente dida han nakalabay nga Lunes kumo usa nga sinyales han pagbabag-o han China han ira taktika ngan an pagpapadara han barko nga pangyera in simbolo naman han agresyon.
