TACLOBAN CITY – Kasumpay han pag selebrar han ika 76 ka tuig han Junior Chamber International o JCI TACLOBAN LOVE, nagdumara ini hin usa nga exhibit nga gin tawag nga “GUGMA: where love meets purpose” – a photo and memorabilia exhibit nga gin dumara naman ha usa nga mall ha Marasbaras, Tacloban City dida han nakalabay nga adlaw.
Kaupod an Tactical Group Operations Region 8 ngan Guinhangdan Palo Liberation Eagles Club, an panuyo hini nga nasabi nga aktibidad in ipakita ha mga kabatan-unan ngan ha mga Taclobanon an mga gin hihimo han organisasyon agud makabulig ha komunidad labi na yana nga panahon, kun diin naatubang kita hin climate change nga nagdudurot hin kalamidad ha aton nasud.
Sumala kan JCI Tacloban Love incoming President Mary Rose Petilla-Paran, nga an mga memorabilia ngan photos nga nag paka display ha nasabi nga exhibit in produkto han gugma nga ira igin hahatag ha komunidad sugad man in karuyag gihapon nira nga makahatag inspirasyon ngan positive change ha mga kabatan-onan nga kun diin usa gihapon nga panuyo nira, in aghaton an mga kabataan ngan iba pa nga mga Taclobanon nga igbulig an ira mga kalugaringon ha mga aktibidades ha ira tagsa tagsa nga kumunidad.
Samtang, sumala kan Sir Ian Rey Diamante han Guinhangdan Palo Liberation Eagles Club, an panuyo man gud han ira organisasyon pag api ha mga sugad nga aktibidad in para makabulig ha mga tawo nga nanginahanglan labi na ha panahon yana nga sagunson an bagyo nga umabot nganhi ha aton nasud.
Gin aaghat gihap niya an katawhan ngan iba pa nga mga organisasyon nga bumulig ngan makigsumpayan ha mga sugad nga aktibidad agud mas damo nga nanginginhanglan pa an mabuligan.
Sumala liwat kan Philippine Airforce 2nd Lt. Tristan Miguel S. Darroles nga an pakig sumpayan ngan pag api man gud nira ha mga sugad nga aktibidad in para makabulig ngan mas makuha pa an kahimyang ha aton national development ngan makag himo ngan makag bug-os hin pagtuo ngan pagtapod ha ira an mga katawhan.
