TACLOBAN CITY – Ginduon han Department of Health region 8 nga diri maaapektuhan an kapasidad han Eastern Visayas Regional Covid 19 Testing Center (EVRCTC ) ha kaluyo nga nagpapadara hin swab samples an Bicol region para igtest ha mao nga laboratoryo.
Una hini dida han nakalabay nga adlaw in nagpadara hin 600 nga mga swab samples an Region V ha EVRCTC tungod nga maabot na ha sobra 1500 an ira backlogs.
Damo manggud an kinahanglan nga igtest han ira laboratoryo tungod liwat nga damo an mga nanguli nga mga LSIs ngan nagkaada liwat hin infection an ira mga health workers nga nakapot han ira laboratoryo.
Sumala kan Dra. Minerva Molon, Regional Director han DOH 8 nga an kadugangan nga mga swab samples nga ig poproseso han EVRCTC in diri makaapekto ha kapasidad hini tungod nga 700 per day an kaya nga igtest han EVRCTC ngan waray pa daw ini umabot ha maximum capacity.
