TACLOBAN CITY – Nag pagawas hin pahimatngon an City Populations Office may pag hisumpay han magkaduru-dilain nga mga programa ngan aktibidad nga ginpapatuman han ira buhatan ha syudad hiton Tacloban—amu an City Population and Development Program.
Usa ha mga pitad han City Population Office in an Advancement of Adolescent Health and Development Program kun diin, nakikipagsumpayan an mga ine ha kumunidad agud igbandilyo an mga pahimatngon nga kinahanglan mahibaruan han mga kabataan; an aktibidad in gin tawag nga Adolescent Sexual Reproductive Health Seminars para ha mga nag eedad 10-19 yrs old.
Mahitungod ha nagtitikahitaas nga ihap hiton teenage pregnancy ha nasud, dida han nakalabay nga tuig, an Civil Registry and Vital Statistics in nakaghipatik hin 11,497 nga livebirths tikang ha mga nagburod ha edad nga 10-15 anyos; 54,510 nga livebirths nama tikang ha 17-anyos paubos nga mga nagburod; ngan 23,260 an nagkaada hin repeat pregnancy.
Nakaka-alarma gihapon an kaso han mga 10-14 anyos nga mga kabataan ha bug-os nga nasud nga naburod dida han 2023 kun diin umabot ini ha 3,342 ngan dida han nakalabay nga tuig-2024 in 379 nga kaso naman han teenage pregnancy an naitala ha syudad hiton Tacloban.
Sumala kan AHD Program Coordinator of City Population Office, Mai Dolore, pinaagi han nasabi nga programa nga Advancement of Adolescent Health and Development Program, mag hahatag ini hin hibaro ngan kaadman ha mga kabataan labi na ha parte han magkaduru-dilain nga sakit panlawas nga posible makuha han mga ine.
Ha lain nga bahin, nagpahayag naman hin nababaraka hi DOH Assistant Secretary Albert Domingo mahitungod nga an pira han mga natapnan han human immunodeficiency virus (HIV) in syahan nga nakig hilawas ha edad nga 16. (via Bombo Niña Magpili)
