INTERNATIONAL – Utro nga gin-kansela han usa nga korte ha Israel an testimonya ni Israeli Prime Minister Benjamin Netanyahu para ha kaso nga kurapsiyon, mahuman ini humangyo hin extention agud atubangon an mga isyu panseguridad kasumpay han ceasefire ha Iran nga nagpapadayon nga gyera ha Gaza.
Sumala ha korte, ginbag-o nira an nauna nga desisyon mahuman nga mabatian an mga argumento tikang kan Netanyahu ngan mga lider han militar ngan chief han Mossad spy agency.
Kasumpay hini, nanawagan hi US Pres. Donald Trump nga igbabasura na an kaso nga gintawag niya nga usa nga “witch hunt” ngan nahangy nga i-kansela ini.
Manunumduman nga hi Netanyahu in naatubang ha tulo nga kaso han korapsiyon, kaupod an pagkarawat hini hin mamahalon nga regalo tikang ha mga bilyonaryo kabalyo han pabor ha pulitika, ngan pagprubar impluwensyahan an media para ha mas positibo nga coverage.
