NATIONAL–Titikangan na han House Committee on Justice an pagdungog ha 4 ka verified nga impeachment complaints kontra kan VP Sara Duterte buwas, Lunes, ika 2 han Marso.
Sumala kan Batangas Rep. Gerville Luistro, chair han komite, an pagdungog nga bubuhaton tikang han ika 2 kutub ika 4 han Marso kun diin nakapokus ine ha pag-eksamin kun mayada ensakto nga form ngan substance an mga reklamo.
Gineksplikar ni Luistro nga gagamiton han komite an kaparehas nga proseso ngan aludayday nga gingamit ha nanguna nga mga reklamo kontra kan Pangulong Ferdinand Marcos Jr. nga na-dismiss han naglabay nga tuig.
An mga pangunahon nga basehan han impeachment in an alegasyon han sayop nga paggamit han P612.5-M nga confidential funds ha Office of the Vice President (OVP) ngan Department of Education (DepEd) , pati na an mga pagtalapas ha Konstitusyon sugad han graft, bribery, ngan dire mae-ekspliakr nga kariko.
Upod gihapon ha mga reklamo an betrayal of public trust mahitungod ha dire pagkilala ha oversight han Kongreso ngan mga ginaalegar nga hulga kontra ha kinabuhi nira Pangulong Ferdinand Marcos Jr., First Lady Liza Araneta-Marcos, ngan anay Speaker Martin Romualdez.
Sumala kan Luistro, tatagan hin higayon an Bise Presidente nga bumaton ha mga akusasyon kumo parte han iya katungod ha due process.
