TACLOBAN CITY – Nagin manilampuson ngan mahinungdanon an nagin pagdumara han Pintados Festival 2023 dida han nakalabay nga Hunyo 24 nga gin atenderan han mga katawhan tikang ha sulod ngan gawas hiton syudad.
Sumala kan Eugene Tan, Presidente hiton Pintados Foundation Inc., waray hira maglalauman nga sugad an magigin kadamo han mga tawo nga maatender ha nasabi nga festival sanglit waray hira mag alutaga hin dako nga lugar nga pagdudumaraan han nasabi nga aktibidad.
Manunumduman nga gindumara an Dance Rituals Presentation hiton Pintados Festival 2023 dida han nakalabay nga Sabado, Hunyo 24, ha Old Capitol Ground.
Ginkilala naman kumo 1st placer han nasabi nga kompetisyon an Tribu Mag-uruma han Alangalang, Leyte, 2nd placer an Tribu Mangirisda han Tanauan, Leyte, ngan naghuman naman ha ikatulo nga pwesto an Tribu Rayhak han Leyte National High School.
Ginpasabot gihapon ni Tan nga posible ha masunod nga tuig in ha Leyte Sports Academy o kun Grandstand na pagdumaraon an mga kompetisyon han Pintados Festival.
Samtang, ginpahayag gihapon hine nga ha masunod nga tuig in igbabalik na iton Kasadyaan Festival kun diin mas daru-dako ine nga aktibidad para ha mga katawhan.
