TACLOBAN CITY – Ginlalauman na ha masunod nga semana yana nga bag-o nga tuig 2021 in magutiay an volume han tawo ha syudad han Tacloban partikular na ha downtown area mahuman an selebrasyon han holiday season.
Una hini, tinikangan han Disyembre 20 tubtob han yana nga Enero in tigda an pagdamo han mga katawhan nga napakadi ha Tacloban para mamalit hin pangandaman para han kapaskuhan ngan bag-o nga tuig.
Sumala kan Tacloban City Vice Mayor Jerry Sambo Yaokasin, tungod nga human na an holiday season ginlalauman na an pag-ubos han ihap han mga katawhan nga mapa-Tacloban.
Naglalaum naman an mao nga opisyal nga magtitikang an mga payouts han mga government assistance agud nga dire gud sugad nga makurian ngan mabuligan an mga katawhan ha epekto han nagpapadayon nga krisis nga durot han COVID-19 pandemic.
