Gin pahayag ni Department of Public Works and Highways (DPWH) Secretary Vince Dizon nga nakatalaan hiya nga makighampang ha Anti-Money Laundering Council (AMLC) ha maabot nga Lunes, Setyembre 15, agud paghingadayan an posible nga pag-freeze ngan pagkumpiska han mga propyedad han mga dabi ha anomaliya ha flood control projects.
Sumala kan Dizon, dire sakto nga mapreso la an mga responsable, pero kinahanglan gihpon maibalik ha mga katawhan an kwarta nga ginkawat tikang ha pondo han gobyerno. An pitad in pwede igpahamtang ha ngatanan han indibidwal nga nasapakahan na o papasakahan pala hin kaso ha Office of the Ombudsman.
Samtang, ginsigurado naman ni Dizon nga andam hira bumulig ha gintukod nga Independent Commission for Infrastracture.
Sumala pa hine, na-secure na nira an ngatanan han dokumento nga posible kinahanglanon han komisyon ha pag-iimbestiga han mga imprastraktura nga ginhimo han buhatan ha nakalabay nga 10 katuig.
Ha pagkayana, samtang dire pa nagtitikang an independent commission, padayon la gihapon an ahensya ha pagpapabaton ha mga dabi.
Dugang pa ni Dizon, dire la gihapon hira maundang ha pagsasalawad hin mga kaso ha Office of the Ombudsman.
