TACLOBAN CITY – Igin pahibaro han City Population Office nga abilable an ira opisina ug social media accounts ha mga teenagers nga nagbuburod ngan nanginginahanglan hin makakaisturya ngan bulig kun diin, usa ha mga puydi kadtuan pa pagpabulig han mga teenagers in an mga teen centers.
Sumala kan POPCOM Program Officer Hedeliza P. Ramos, gin tatalinguha naman han ira opisina nga magkamay-ada hin teen centers an mga eskwelahan agud magkamay-ada hin safe place an mga kabatan-onan nga ira masusumatan kun may-ada an mga ini problema nga gin kakaatubang ha ira kinabuhi.
Samtang, abre gihapon an purtahan han district health centers kumo accredited ngan trained an mga ini mag hatag hin adolescent health friendly services ha mga kabataan hin waray panhuhusga ngan stigma.
Gin pasabot naman han opisina han City Population Office nga may-ada abilable nga programa an ira opisina nga panuyo nga tutduan an mga kag-anak kun patiunan-o ig handle an ira mga anak nga nagburod hin maaga.
Sugad man, kalakip hini an responsible parenting ngan family planning ha nga mag teenage couple agud matutduan han importansya han family planning, pagpapadako hin bata, ngan kun patiunan-o maging responsable nga kag-anak. (via Bombo Niña Magpili)
