Umapela hi Senator-Judge Robin Padilla ha House prosecution panel nga dire magin “one-sided” ha impeachment trial ni Vice President Sara Duterte, samtang ginhihingadayan an kredibilidad han mga testigos nga igin atubang han parte han prosekusyon.
Ginbuhat ni Padilla an pahayag mahuman an ira pagkabatunay ni House lead prosecutor Gerville Luistro kasumpay ha kwalipikasyon han mga testigos han prosekusyon, kaupod hira National Bureau of Investigation (NBI) Senior Agent Mark Calilung, ngan NBI Regional Director Jeremy Lotoc.
“Sana hindi one-sided ang ating prosecution,” sumala kan Padilla, nga nagin rason agud pamutngaan ni impeachment court presiding officer Senator-Judge Francis “Chiz” Escudero an reaksyon han mga ada ha sulod han session hall.
Ugsa an nasabi nga pahayag, gin kwestyon ni Padilla an kredibilidad ni former self-proclaimed Davao Death Squad (DDS) member ngan anay police officer Arturo Lascañas.
Dugang pa ni Padilla, an pabag-o bag-o nga mga pahayag ni Lascañas kasumpay ha pagkakadabi ni anay Presidente Rodrigo Duterte ha mga extrajudicial killings in nangangaruyag-sidngon nga buwaon ini.
Igin eksplikar naman ni Luistro nga an dokumento ni Lascañas in igin lakip la agud igpakita kun patiunan-o nga ginhimo han NBI an imbestigasyon kasumpay han gin aalegar nga paghulgar ni VP Sara kan Presidente Ferdinand Marcos Jr.
Han pakianhan naman ni Escudero kun maikokonsidera nga dire matatapuran nga testigos an usa nga tawo nga mayda pagbag-o bag-o nga testimonya, umabuyon hi Luistro pero gin klaro nga dire ini partikular nga natudlok kan Lascañas.
Samtang, ginhangyo ni Padilla ha prosekusyon nga likayan nga ig atubang an mga witness nga mayda kaso nga perjury, gintudlok han senador hira Atty. Jimmy Lotoc ngan Jhon Mark Calilung.
Bumaton hi Luistro nga namapatud-an han ira parte nga waray nakabinbin nga kaso kontra ha mga witnesses han prosekusyon. Dugang pa niya, an conviction in dire grounds agud ma-disqualify an usa nga testigos labot nala kun ini in pinal na, mayda kaangayan nga sirot ngan mayda koneksyon ha moral turpitude.
Dinhi in utro nga iginduon ni Padilla an iya pahayag nga dire magin “one-sided” an proseso. Nagkamay-ada naman hin reaksyon tikang ha mga tawo ha sulod han bulwagan sanglit utro nga nagpahinumdom hi Escudero nga igpabilin an kahapsay.
“Hindi po sila allowed mag-ingay, korte po ito,” sumala kan Padilla.
Ha pag-iha, gin klaro ni Padilla nga an iya pahayag in dire natudlok ha pagpabor ha diin man nga parte kundi ha panginahanglan hin patas nga pagkita ha bug-os nga proseso han impeachment.
Igin eksplikar niya nga an iya punto in mayda koneksyon ha istoryahon han pagbulig han pira nga senador ha pagdungog ngan ha mga nagin pahayag kasumpay ha posible nga dire pag-upod ha ira nga makabotos ha impeachment court.
Manunumduman nga tulo nga senador an waray yana ha impeachment trial kaupod dinhi hira Senator Ronald “Bato” Dela Rosa nga hasta yana in dire pa nagpapakita tikang ha lumakat ha kustodiya han Senado; Senator Jinggoy Estrada nga naatubang ha kaso nga plunder kasumpay ha flood control scandal; ngan hi Senator Rodante Marcoleta nga nahipatik nga naatubang gihapon ha kaso nga plunder nga parehas nga nakapreso ha Quezon City Jail.
