TACLOBAN, CITY – Ginpaangbit han National Housing Authority Region 8 nga mayda pitad han gobyerno nga tagan an mga anay miyembro han rebelde nga grupo hin pabahay pinaagi ha kapas hiton Pambansang Pabahay Para sa Pilipino Program nga ilarum han Republic Act No. 12216.
Basar ha datos han Armed Forces of the Philippines (AFP) nga aada ha 1,789 nga rebelde an sumurender ha gobyerno dida han 2025, kun diin kaurugan han mga ini in waray permanente nga gin-uukyan.
Sumala kan National Housing Authority Region 8 Regional Manager, Engr. Clemente A. Dayot, nga dako nga bulig ini nga programa para ha mga anay miyembro han rebelde nga grupo kun diin, pinaagi han Enhanced Comprehensive Local Integration Program o E-CLIP, matatagan an mga anay rebelde hin libre nga house and lot tikang ha NHA ngan financial assitance agud makabalik ha normal an ira mga panginabuhi.
Dugang naman hini, nga pondo nala an ira ginhuhulat agud ma-implementar na nira an programa dinhi ha Sinirangan Bisayan ngan ginlalauman naman nira nga matatagan an ira buhatan hin pondo yana nga tuig.
Samtang, basar naman ha pinakabag-o nga datos, aada ha 423,430 nga housing units iton nahimo han 4PH housing program tinikangan dida han 2022 kutob Pebrero 2026.
(via Bombo Jake Paguipo)
