LAWAAN, EASTERN SAMAR – Usa nga insidente hin panhold-up an nahitabo ha usa nga gasolinahan ha Brgy. 8, Lawaan, Eastern Samar dida han nakalabay nga adlaw.
Ginkilala an biktima kan Chistopher Edradan, 37-anyos an pangidaron, manager han gasolinahan, ngan residente han Brgy. 6, Lawaan, Eastern Samar.
Sumala kan Lawaan Municipal Police Station Officer in Charge, PLt. Jonathan Rivas, nahitabo an insidente ha butnga han alas-2 kutob alas-4 han maagahon dida han Hulyo 28.
Kun diin, sumala ha pahayag han biktima, mga banda pasado alas-2 han maagahon han nasabi nga adlaw in nahipausa ine mahitungod nga duro an pag-inusig han ira ayam nga nakadto ha ira backdoor sanglit ginpanginano ine niya pero kahuman daw hadto in waray na hiya sumabot han mga sumunod nga panhitabo.
Nahiabtan nala daw ine han usa pa niya nga katrabaho nga nakahuyang ha luyo han gasolinahan ngan baga-baga hin waray haiya kalugaringon.
Ha gindumara nga imbestigasyon, nahibaruan nga dire dapat an manager an maduty ha nasabi nga gab-i pero mayda daw emergency an maduty unta sanglit an manager nala an nag-salo han duty.
Durante han panginano han mga otoridad ha lugar, didto nahisabtan nga abri na an vault nga ginbubutangan han kwarta nga ira halin ngan waray na didto an purluminos P400,000 nga kwarta, pero nakadto pa an susi nga ginamit han pag-abri ngan waray gihap nakita nga senyales nga gin pwersa an pagkuha han kwarta.
An nasabi nga susi kapot dapat han manager pero ha pagpakianhi hine han kapulisan kun nakain tatagua an susi in waray daw hiya mahinumdom kun diin niya kahibutang.
Nahisabtan gihapon ha imbestigasyon nga mayda la naka-install nga mga CCTV an gasolinahan pero haros usa katuig na daw ine nga dire nagana.
Samtang, waray naman iba nga samad an biktima kundi an gutiay nga pilas haiya may ulo.
Padayon naman an gindudumara nga imbestigasyon han mga kapulisan kasumpay han insidente ngan ginkikita gihapon an ngatanan nga anggulo han krimen agud mahibaruan an tinuod nga panhitabo nga mapagbaton an responsable.
