TACLOBAN CITY– Titikangan na an paghingayad han Biliran Bridge mahuman nga magkamayda ine hin pondo nga maabot ha Php30-M.
Ginbuyagyag ni OIC-District Engineer Irwin L. Antonio han Department of Public Works and Highways (DPWH) – Biliran District Engineering Office, nga nagpapadayon yana an proseso han procurement pinaagi hin negotiated procurement agud mapadagmit an proseso hini han pag-bidding.
An Php30-M nga alokasyon para han pag-ayad han tulay in nag-lalakip hiton pagliwan han mga corroded nga mga bolt ngan steel plates ngan pagliwan han mga nadaot nga expansion joints gamit an finger type expansion joint ngan iba pa nga nadaot nga major bridge components.
Sumala kan OIC-DE Antonio, ginrekomenda an emergency nga pag-ayad mahuman nga may mahikit-an nga mga depekto an tulay dida han technical inspection nga ginbuhat dida han Disyembre 24, 2024, usa ka adlaw mahuman nga mag-viral an video an tulay han Biliran.
An 49-anyos nga Biliran Bridge amo an nagsusumpay han Probinsya han Biliran ngan han Leyte.
Samtang, ginklaro naman ni OIC-DE Antonio nga waray closure nga igpapatuman ha Biliran Bridge bisan kun magtikang na an paghingayad. An tulay in magpapabilin nga abrido ngan maaagian la han mga sarakyan nga may kabug-aton nga 5 tonelada tipaubos.
Ha pagkayana, mahugot gihapon nga gintitimbang han DPWH BDEO an mga sarakyan antis sumulod para maipatuman an 5-Ton nga limitasyon han tulay.
An mga mabug-at nga sarakyan nga sobra 5 ka tonelada an kabug-aton in gindadara pinaagi hin barko.
An pag-ayad han tulay in nagpapakita han padayon nga paningkamot han DPWH paghatag hin sustenable ngan masasarigan nga imprastraktura para han kaupayan han katawhan han Biliran.
