NATIONAL – Ginsigurado ni Akbayan Partylist Rep. Perci Cendaña nga utro nira ginduduso ha 20th Congress an P200 legislated wage bill.
Ini an pahayag ni Cendaña kabahin han kawaray aksyon han Senado ha nasabi nga balaudnon ha luyo nga may-ada igo nga panahon ngan higayon nga ig-adoptar an House version agud mapadagmit an pagpasa han balaudnon.
Dugang pa niya nga kinahanglan daw ini tungod nga pirme la nagtitikahitaas an presyo han mga papliton.
Sumala han kongresista, kun seryoso an Senado nga umentohan an suhol han mga trabahador, angay unta nga gin-adoptar dayon nira an House version han 200 pesos nga umento, labi na nga pira la nga mga pitad an puydi unta ipasa ha Malacañang para pirmahan.
Labot hini, ginsaway han kongresista an LEDAC nga pinangungunahan ni Pangulo Bongbong Marcos tungod han gin-aalegar nga waray pagsertipikar han balaudnon kumo urgent.
Kadungan hini, ginkwestyon ni Cendaña an mga prayoridad pan-ekonomiya han administrasyon Marcos ngan an paghilom hini ha isyu ha mga trabahador.
Imbes nga suportahan an 200 pesos nga umento han suhol, gin-aalegar nga iginduso han Senado an 100 pesos nga umento, nga makalolooy nga diri igo.
