NATIONAL – Nag alutaga an Department of Agriculture (DA) hin sobra P150 milyon nga kantidad hin fuel subsidy para ha mga paru-pangisda ngan parag-uma mahitungod han padayon nga paghitaas han presyo han krudo ngan han petrolyo.
Sumala kan Assistant Secretary for Special Concerns and Official Development Assistance ngan Agriculture Spokesperson Engr. Arnel De Mesa, tikang ha kabug-usan nga budget, P75 milyon an nakaalutaga para ha mga paru-pangisda samtang an nasasalin naman in para ha mga parag-uma.
Dugang pa hine, mayda special provision an paghahatag hin fuel subsidy ha General Appropriations Act nga kinahanglan in umabot anay an presyo han produkto nga petrolyo ha $80/per barrel ugsa maipanhatag an pondo para ha mga benepisyaryo hine.
Nanawagan naman an departamento ha mga retailers ngan stakeholders han agricultural sector nga dire unta abusuhon han mga ine an paghitaas han presyo han lana para pahitas-an gihapon an ira mga ginbabaligya nga mga agricultural products.
Padayon naman nga nakatutuok an ira ahensya kaupod an Department of Trade and Industry (DTI) ha pagmonitor han mga presyo han mga papliton ha mga merkado agud masigutado nga dire magkakamay-ada hin tigdaay nga paghitaas ha presyo han mga ine mahitungod ha nagin oil price hike ha gasolina.
