INOPACAN, LEYTE – Malipayon nga ginpahibaro ni Leyte 5th District Congressman Cari nga ha tulo nga mga ginpasahan niya mga lugar para pagtukuran han Tourist Rest Area, naaparubahan han Department of Tourism an Inopacan, Leyte.
An Inopacan, Leyte manggud in mayda upat nga mga isla nga gindadayo han mga turista, amu an Cuatro Islas o an mga Isla han Apid, Digyo, Mahaba, ngan Himokilan.
Mahitungod han nae-eksperyensyahan nga traffic han mga turista kada-summer season, nahuna-hunaan han Kongresista nga makipagsumpayan ha Department of Tourism agud magkaada hin Tourist Rest Area an nasabi nga lugar, nga pwede pahuwayan han mga turista samtang naghuhulat an mga ine han ira sarakyan tikadto ha mga isla.
Sumala kan Leyte 5th District Congressman Carl Nicolas Cari, ada ha P10 milyon an pondo han nasabi nga proyekto kun diin ginlalauman nga may-ada ine Pasalubong Center, restroom, charging station, shower room, ngan iba nga pasilidad.
Ginlalauman gihapon nga mahuhuman an nasabi nga parahuwayan yana nga tuig-2025 ngan magagamitan na ine ha masunod nga tuig-2026.
Kalakip gihapon ha nakatalaan nga pagtukuron ha usa han mga barangay han Inopacan an pier o duruungan han mga sarakyan pandagat.
Samtang, gin lalauman naman nga pag pagtutukuron gihapon an Tourist Rest Area ha Matalom, Leyte kun diin nahimumutang an Canigao Island ngan ha Baybay City nga pagtutukuran naman hin Heritage Site kasapit han simbahan. (via Bombo Niña Magpili)
