TACLOBAN CITY – Andam daw hi Ormoc City Mayor Richard Gomez nga atubangon ha korte an National Housing Authority (NHA) kun maghahaon ini hin defamation charges ala kontra ha iya kasumpay ha iya naging kritisismo bahin han daw substandard nga materyales nga gingamit ha pagpapatindog han 16 nga housing units ha usa nga resettlement sites ha Brgy. Gaas, Ormoc City.
Ini naman in mahugot nga ginpanhimuwa han NHA kun diin gin-ayat ni General Manager Marcelino Escalada Jr. hi Gomez nga kanselahon nala an ira building permit kun waray hiya pagtapod ha kalidad han ira proyekto.
Sumala naman kan Mayor Gomez, imbes nga masina an NHA ha iya pagpuna ha ira proyekto in kinahanglan lugod nga inspeksyunon nira an mao nga pabahay ngan an kontraktor hini.
Dugang pa hini, nga puros la daw yakan hi Escalada pero waray pa man hini personal nga nakit-an an tinuod nga kabutangan han housing project.
Gin-ayat gihapon hini an NHA General Manager nga kumadto pagbisita mismo ha Brgy. Gaas agud nga makit-an hin personal an mga gintindog nga housing units.
Kun waray daw may mahihimo hi Escalada in dapat magresign nala hiya agud nga balyuan hiya hin mas responsable nga opisyal.
