TACLOBAN CITY – Preparado na an ngatanan para ha pagbubuhaton nga plebisito o eleksyon kun diin papakianhan an katawhan kon masige hira nga pag-urusahon ngan himuon nala nga tulo nga barangay an 28 nga mga barangays ha Ormoc City ha masunod nga bulan.
Sumala kan Comelec Eastern Visayas Regional Director Jose Nick Mendros , plantsado na an security preparations para ha mao nga eleksyon.
Nakatalaan nga pagdumaraon an plebesito ha maabot nga Octobre 8 ha bisa han Comelec Resolution No. 10796 nga ginpagawas dida han June 22, 2022.
Mahuman an plebesito an Barangays 1, 2, 3, 4, 5, 6, 7, 8, 12, 13, 15, 17, 23 ngan 27 in tatawagon nga Barangay South, an Barangays 9, 10, 11, 16, 18, 25 ngan 28 in ngangaranan nga Barangay East, ngan an barangay 14, 19, 20, 21, 22, 24 ngan 26 in tatawagon liwat nga Barangay West.
Nag alutaga an Ormoc city government hin P8 million para ha pagbubuhaton nga plebesito.
Ini nga pag-urusa ha mga barangay han mao nga syudad in para ha mas maupay pa nga serbisyo ha mga Ormocan.
An mga barangay nga ginlakip ha plebesito in amu an mga gudti hin duro ngan diri kaya nga ighatag an mga kinahanglanon nga pasilidad ha mga molopyo sugad nala hiton health centers ngan diri gihap nira kaya bisan an pagbayad para ha pagkuha hin mga tanod.
Makuri daw an pag-aghat han mga opisyales ha barangay nga pag urusahon hira pero umabuyon na an mga ini mahuman nga mabaruan han mga ine nga para ini ha ikakaupay han ira mga molopyo.
