TACLOBAN CITY – Gintikangan na han Leyte Normal University an ORIE FAIR 2026 kun diin, magkaduru-dilain nga unibersidad an nakiparte ngan ginpresentar an ira mga research ngan innovative projects.
Naki-usa dinhi an Eastern Samar State University, Biliran Province State University, Samar State University, ngan Visayas State University.
Gintagan duon ni Leyte Gov. Jericho Icot Petilla an importansiya han research and development (R&D) ha pag-uswag hiton nasud, labi na ha panahon nga madagmit itonglobalisasyon ngan pag-ribhong han makabag-o nga mga teknolohiya sugad han artificial intelligence (AI).
Dugang pa han opisyal, waray nasud nga naursa kun dire marig-on an pundasyon ha Research Development and Innovation.
An R&D an nagsisirbe nga pamaagi agud makaghimo hin mga bag-o nga teknolohiya, mapahitaas an produktibidad, ngan makabiling hin pan-ihaan ngasolusyon ha mga problema hiton nasud — tikang ha agrikultura kutob ha industriya.
Gineksplikar hini nga kun dire mamumuhunan an Pilipinas ha makabag-o nga edukasyon ngan teknolohiya in mabibilin an nasud.
Gintagan-duon gihapon ni Petilla nga presente mas kilala an nasud kumo net importer han teknolohiya kaysa exporter. Mahitungod hini, nagpapabilin nga ayat kun patinunan-o makakasabay ha mga nasud nga maiha na nga nag-aalutaga hin dako nga pondo para ha R&D.
Samtang, magpapadayon an aktibidad kutob Marso 5 ha Research, Extension, and Innovation Center, Government Center, Brgy. Baras, Palo, Leyte
