TACLOBAN CITY — Dead-on-the-spot mahuman pusilon han mga gintutuuhan miyembro han New People’s Army (NPA) samtang nagyayakan ha atubangan hiton mga residente ha Brgy. San Francisco, Las Navas, Northern Samar.
Kinilala an biktima kan Sgt. Marlon Bayani Baysa (Inf) PA, 34 anyos ngan miyembro han Community Support Program team han 20th Infantry Battalion.
Sumala kan PLt. Col. Bonifacio Ricafort, Information Officer han Northern Samar Police Provincial Office, naghahatag hin mensahe hi Sgt. Baysa para hiton seguridad ha pagseselebrar ha tidaraon nga Flores de Mayo han mao nga baranggay.
Basar ha inisyal nga imbestigasyon, an mga gintutuohan nga mga rebelde in umatindir mismo ha mao nga aktibidad kun diin tigda nala ginpusil hi Sgt. Baysa ha likod.
Nakag-angkon hin inig-an hin pusil ha liog an mao nga opisyal nga dayon hini iginkamatay.
Ha pagkayana in nagdudumara na hin manhunt operation an mga otoridad ha mga suspek nga gintutuohan naman miyembro han New People’s Army (NPA).
