TACLOBAN CITY – Ginklaro han pamunuan han 578 Emporium nga dire ha ira Tacloban branch kundi ha Borongan Eastern Samar an may nahipatik nga COVID-19 confirmed patient nga nakasulod ha ira establishmento.
Una hini nagdurot hin kawurok ha publiko an nagsarang nga report nga daw may nakasulod nga COVID-19 patient ha 578 Emporium ngada han Agosto 13, banda ala una ngada alas dos han kulop.
Sumala kan Jesus Tuyo III, HR Officer han 578 Emporium, waray sugad nga insidente ha ira Tacloban branch ngan iba pa nga branches ha rehiyon tungod nga ha Borongan branch ini nahitabo.
Mahitungod hini in paralisado ha pagkayana an operasyon han 578 Borongan tungod nakaisolate an tanan han ira mga empleyado ha sakob hin 14 diyas.
Ginklaro naman hini nga dire ira empleyado an nagpositibo kundi ira customer nga positibo ngayan ha COVID-19.
