TACLOBAN CITY – Padayon an monitoring han Office of Civil Defense (OCD) Regional Office 8 ha sitwasyon ha bug-os nga Sinirangan Bisayas yana nga padayon pa an naeeksperyensyahan nga pag-inuran ha pira nga mga lugar ha rehiyon.
Sumala kan Rey Gozon, Chief han Disaster Risk Reduction Management Division han OCD 8, basar ha report nga ginsumiter ha ira, 19 nga mga barangay ha Northern Samar an ginbaha han naglabay nga mga adlaw tungod han waray wantas nga pag-inuran.
Kasagaran ha mga ini in low lying ngan flood prone areas pero waray naman report nga nakaaabot OCD bahin hin insidente hin landslides.
Dugang pa hini nga passable na gihapon tanan han mga karsada ha mao nga probinsya sugadman han pira pa nga parte han Samar areas nga una nga naitala nga unpassable tungod han pagbaha.
Nanawagan naman an mao nga opisyal han mga local disaster risk reduction management officers ha mga LGUs nga bantayan an weather conditions ha ira tagsa nga lugar agud nga makapagbuhat han kaangayan nga mga pitad ngan aksyon para ha ira mga molopyo.
