TACLOBAN CITY – Andam na an pamunuan han Tacloban New Bus Terminal para han hul-os nga implementasyon han No Face Shield No Ride Policy ha mga pasaheros han mga public utility vehicles (PUVs) tinikangan buwas nga adlaw, Agosto 15.
Sumala kan Allan Ronda, Admin IV Officer han New Bus Terminal han Tacloban, andam na an ira buhatan para han mao nga implementasyon han palisiya ngan han naglabay nga semana in kinada-adlaw an ira pasabot ngan pahimatngon ha publiko bahin hini.
May mga nakatuka na nga personnel nga mag-iinspeksyon agud nga masiguro nga may sul-ot nga face mask ngan face shield an pasaheros san-o nga sumakay.
Maagi gihapon anay ha scanner han QR code an pasaheros ngan sugadman thermal o temperature check san-o nga pasakyon ha PUV.
Presente naman an mga tinaglawas han Traffic Operations Management Enforcement and Control Office (TOMECO) para mag-asister ha implementasyon han palisiya.
