NATIONAL NEWS- Ginlalauman han Department of Trade and Industry (DTI) nga mahuhuman ha tuig 2026 an negosasyon kasumpay ha reciprocal tariff rate ha butnga han Pilipinas ngan Estados Unidos.
Manunumduman han nakalabay nga Hulyo, gin-anunsyo ni US President Donald Trump an paghatag hin 19% export tariff ha mga produkto nga tikang ha Pilipinas.
Subay ha DTI dire pa ine pinal ngan hapagkayana padayon pa ine nga ginpapag-himangrawan.
Pag-esplikar ni DTI Undersecretary Allan Gepty, unilateral imposition ine hiton US, sanglit ginduduso la gihapon han Pilipinas an negosasyon uagud nga makakuha hin patas ngan kasarabutan.
Dugang pa hine, waray la gihapon nasud o ekonomiya nga mayda pinal o ginpirmahan nga kasarabutan ha US kasumpay ha nasabi nga himangrawon.
Ginpahayag gihapon ni Gepty nga nakagsumiter na an Pilipinas hin listahan han mga produkto nga karuyag nira ma-exempt ha taripa, kalakip na an produkto pan-agrikultura sugad hiton lubi ngan pinya.
