Positibo an National Bureau of Investigation nga kaya mahibalik an mga kinawat nga yaman tikang ha maanomaliya nga flood control projects.
Ha gindumara nga presscon han nasabi nga buhatan, iginpahayag han presente nga direktor nga hi Retired Judge Jaime B. Santiago nga pwede ine mahitabo.
Duon pa hine, pwede ngan posible marekober pa han gobyerno an kwarta nga nakuha han mga dabi tikang ha mga proyekto nga naaatubang ha kontrobersiya.
Natuod manggud an nasabi nga direktor nga marerekober pa an gintatawag nga ‘ill-gotten wealth’ ha nagpapadayon nga paluyo-luyo nga pag-iimbestiga kasumpay ha nasabi nga isyu.
Samtang, ha nagin pamakiana naman han Bombo Radyo ginparayaw ine an kapas han buhatan agud mapanginano hin maupay an mga marerekober nga salapi in kaso.
Dugang pa hine, mayda mga propesyunal nga dalubhas ha forensic accounting an kaubulig ngan kaupod ninra ine ha pag-iimbestiga.
