TACLOBAN CITY – Ginpahayag han Department of Health (DOH) Regional Office 8 nga kalakip ha mga pagtigaman nga gindudumara yana nga bulan han Hunyo an pagsalin-urog han National No Smoking Month.
Sumala kan Krystle Charisse Daya-Magos, Program Manager han DOH Eastern Visayas, an mao nga pagsalin-urog han National No Smoking Month yana nga Hunyo in nagpapanuyo nga mapaabot ha ngatanan nga mga katawhan an hibaru-anan bahin han dire mag upay nga mga epekto ngan kadelikaduhan han paninigarilyo.
Lakip gihapon ha ira awareness campaign nga gindudumara an pagpapasamwak labi na ha mga kabataan bahin han magraot nga epekto gihapon han vaping o e-cigarettes.
Dugang pa hini nga panuyuan gihapon han National No Smoking Month nga maipaabot ha mga local government units an importansya han pagpapatuman o pag-implementar han smoke free environment agud nga maproteheran an mga katawhan ha kadelikaduhan han paninigarilyo ngan vaping sugadman maproteheran gihapon an mga non-smokers tikang ha second hand smoke.
