BILIRAN – Suportado han probinsya han Biliran, ha pangunguna ni Governor Rogelio Espina, an National Fiber Backbone Project nga ginlunsar han Department of Information and Communications Technology ha Palo, Leyte ha pangunguna ni Pangulo Ferdinand “Bongbong” Marcos Jr.
Sumala kan Governor Espina, dako an bulig han proyekto ha pagpapadali ngan pagpahaluag han internet connection ha probinsya, labi na ha mga harayo ngan tay-aw nga lugar.
Ginklaro niya nga importante an interconnectivity ha panahon han globalization basi masiguro nga may akses an publiko ha impormasyon, labi na ha internet.
Iginpahayag gihapon ni Espina nga plano niya an pagtukod hin provincial call center ha Biliran nga makakabulig ha mga waray trabaho nga propesyonal, sugad han mga maestro nga diri na-absorb han DepEd ngan mga fresh graduates.
Ini nga National Fiber Backbone Project in makakabulig ha komunikasyon ngan disaster preparedness, labi na nga haros katunga han 132 nga barangay ha Biliran in mahina o waray internet signal.
Personal naman nga nakahimangraw ni Governor Espina hi Pangulo Marcos Jr. ha grand launch han National Fiber Backbone Project Phase II ngan III, nga gintambungan han mga opisyal tikang ha gobyerno, pribado nga sektor, ngan mga lokal nga lider.
Ha ilarom hini nga proyekto, in magbubutang hin high-capacity fiber optic cables nga magsusumpay ha magkalain-lain nga parte han rehiyon. Kumpyansa naman hi Espina nga magreresulta ini hin damo nga oportunidad ha edukasyon, panlawas, negosyo, ngan iba pa nga mga serbisyo. (via Bombo Shiela Encio)
