TABANGO, LEYTE – Namimiling la unta hin gagamba hi alyas Jon-Jon han aksidente ini makagat hin halas ha Sitio Tabayla, Brgy. Campokpok, Tabango Leyte, pasado alas 7 han gab-i han mga nakalabay nga adlaw.
An biktima in usa nga 16-anyos nga ulitawo, grade 10 student ngan residente han mao nga lugar.
Basar ha impormasyon, tipauli na an biktima ha ira balay mahuman nga mamimiling ini an duha pa nga menor de edad hin gagamba ha kakahuyan kun diin, aksidente nga natamakan hini an usa nga malara nga klase hiton halas.
Sumala pa ha impormasyon, nag “self-medicate” pa an biktima tungod nga daw bangin mag-isog an kag-anak hini kun mahisabtan nga may samad an biktima, pero mahuman an pira ka minutos in nakaabat na an biktima hin malain ha iya lawas.
Dayon naman nga gindara an biktima han iya kag-anak ha kahirani nga health center pero waray na ini kauli-i matungod nga nagsarang na an lara han halas ha lawas hini.
Samtang nagpahimatngun naman an mga otoridad han Tabango, Leyte nga maghirot ngan kun mahihimo in dire na lumakat kun masirom labi na ha mga lugar nga mabanwa matungod nga hibernating season naman gud hiton halas masukot na an mga ini mahitarapo ha mga kabanwaan.
