TACLOBAN CITY – Maabot na ha 232 nga mga violators an nadakop han mga kapulisan mahitungod han pagtalapas han mas pinahugot nga quarantine measures mahuman nga igpailarom utro ha general community quarantine (GCQ) an bug-os nga Tacloban.
Sumala kan Pol. Capt. Marjorie Manuta, tagapagyakan han Tacloban City Police Office (TCPO), kadungan han pagpapailarom ha GCQ han syudad an implementasyon han mga kapulisan han Simultaneous Anti-Criminality and Law Enforcement Operation (SACLEO).
Kasagaran han mga violators in mga nagtalapas han mandatory wearing of facemask, anti-smoking, comprehensive traffic management code han Tacloban, ngan sugadman curfew.
An mga ini in gin-isyuhan hin citation tickets nga may kaangayan nga penalidad ngan sugadman nagpailarom gihapon ha lecture.
Nanawagan naman ini ha publiko nga magsunod ha mga ginpapatuman nga protocols ha syudad para han katalwasan han ngatanan labi na gud ha pagkontra han pagsarang han COVID-19.
