TACLOBAN CITY – Magkakamay-ada hin bag-o nga ruta an multicab nga Campetic ha pagsulod han mga ine ha syudad han Tacloban.
Sumala kan TOMECO Operation and Enforcement, Restituto Reglos, nagkasarabot an mga kooperatiba nga pasusudlon an multicab nga Campetic ha syudad han Tacloban kada rush hour ngan tikang la hiton Lunes ngada ka-Biyernes.
Adi naman an magigin bag-o nga ruta han biyahe nga Campetic kada Lunes ngada ka-Biyernes:
Tikang ha Campetic – diretso ha Marasbaras – liko ha Rotonda – tadong ha Angelicum – liko ha Youngfield – sulod ha LNHS nga karsada – diretso ha EVSU – liko pato-o ha Avenida Veteranos St. – liko-pasulod ha Paterno St. – liko pa-wala ha Youngfield – pa-balik ha Campetic
Igpapatuman la an nasabi nga ruta kada alas-6:30 ngada hiton alas-9 hiton aga ngan kada alas-4 hiton kulop ngada hiton alas-7 hiton gab-i.
An nasabi nga pitad in kumo pag-akomodar han mga istudyante nga nasulod ha syudad agud dire makurian an mga ine ha pagbiyahe.
Samtang, kada Sabado ngan Dominggo in mabalik naman ha normal nga ruta an biyahe nga Campeticm, karuyag sidngon tikang ha Campetic in madiretso an mga ine ha Abucay Terminal ngan vice versa.
Ha pagkayana in nagpapadayon an bag-o nga ruta, pero sumala kan Reglos, ine in dry run pala ngan padayon pa an pag-aram kun ine gud an mas maupay nga ruta.
Nakatalaan naman ig implementa an bug-os nga implementasyon han nasabi nga ruta ha pagtikang hiton klase, Hunyo 16.
