Usa nga ascetic monk nga nagngangaran nga Daulat Giri Ji Maharaj an lima katuig na nga paru-padayon nga nakatukdaw mahuman manumpa ngan dire malingkod o mahigda ha sulod han 12 katuig.
Kaupod hi Maharaj ha sekta nga Khareshwari o “Standing Babas,” kun diin nanunumpa an mga membro hini nga magpapabilin nga natukdaw kumo usa nga klase hin sakripisyo agud limpyuhon an ira kalag ngan mas mapahirani ha Diyos nga hi Shiva.
Agud matuman an nasabi nga panata, nagamit an mga monghe hin mga lubid, duyan, ngan mga espeyal nga harness agud mapabilin nga nakatukdaw bisan pa bumigay an ira mga tiil.
Ha mga litrato nga video ni Daulat, makikita hiya nga napahuway ha usa nga nakabitay nga duyan samtang an iya mga tiil in duro nga nanhuhubag ngan nangingitom. An kawaray pagkiwa ngan an waray undang nga pagtukdaw an nagdurot hin duro nga epekto ha sirkulasyon han iya dugo ngan pankabug-usan nga panlawas. Nababaraka naman an kadam-an nga posible umabot ha punto nga kinahanglan utdon an iya mga tiil ugsa pa man niya mahuman an 12 katuig nga panata.
Kadam-an ha mga panginahanglan ni Daulat in gin aasikaso han mga volunteers han ira templo. Regular nira nga ginbubutangan hin ointment ngan cream an mga tiil hini agud maibanan an kondisyon hini. Bisan man nalilimitahan an iya posisyon an iya paggios, iginpapakita ha pira nga video nga nakakagios la gihapon ini hin gutiay agud makakadto ha kasilyas.
Nagpahimatngon naman an mga doktor nga an duro kaiha nga pagtinukdaw in nagpapahitaas han venous pressure. Nagtitikang ini ha panhubag ngan pagsakit pero posible ini mahingadto ha mga nakakamatay nga kondisyon sugad han deep vein thrombosis.
Subay ha usa nga eksperto han medisina, nakukurian an mga ugat ha tiil nga atuhan an gravity agud magpadara hin duro pabalik ha kasing-kasing kun maiha na nga nakatukdaw. Mahitungod nga waray “pumping action” o pagkiwa an mga kalamnan hini, natitirok an dugo ha ubos nga parte han lawas.
