TACLOBAN CITY – Ginpangunahan hiton Ormoc City Police Office an Mobile Library Service nga kun diin, nakaghatag an nasabi nga serbisyo hin kalipay ngan kadugangan nga kaadman ha mga kabataan ha mga barangay ha siyudad han Ormoc.
Ginhimo nga library an patrol car han kapulisan hiton Ormoc kun diin, puno ini hin mga magkadurudilain nga barasahon sugad nala hiton mga story books nga nakaghatag hin maupay nga leksyon, kaadman, ngan kalipayon ha mga kabataan. Mayda gihapon hira activity area para liwat hiton mga kabataan nga karuyag mag-drawing o kun mag-kolor hiton mga coloring books.
Sumala kan PLTCOL Joemen Collado, Information Officer han Ormoc City Police nga an mao nga serbisyo in kaupod han programa hiton Ormoc Development Team nga City Hall on Wheels nga kun diin, naghahatag hira hin mga serbisyo ngan bulig ha magkadurudilain nga barangay ha Ormoc.
Panuyuan hini Mobile Library Service in agud makag-hatag li-aw, tutduan iton mga kabataan bumasa ngan mabaruan han mga ini iton mga mag-upay nga leksyon pinaagi hiton mga barasahon samtang naatender iton mga kag-anak nira hiton mga seminar o kun mga serbisyo nga ginbubuhat naman han City Hall on Wheels.
Dugang naman ni Collado nga nagin malinampuson naman iton ira pagdudumara hini nga serbisyo, ngan nakikita gihapon niya nga nauli nga malipayon iton mga kapulisan nga napartisipar ha mao nga aktibidad.
