TACLOBAN CITY– Gin-araro han usa nga minivan an nakaparada nga tricycle ha Brgy. Canalom, Inopacan, Leyte, kun diin nagdiretso ine ha pagbungo ha usa nga panimalay.
Sumala kan PCPL. Lyandro Morata, Investigator Inopacan Municipal Police Station, nga dayon narespondihan han mga kapulisan an nasabi nga panhitabo.
Ginkilala naman an driver han minivan nga alyas Pao-Pao, 64-anyos ngan residente han Mahaplag Leyte.
Subay ha ira nagin imbestigasyon, nahingaturog an driver, rason han pagararuha hine han nakapara nga motor ha ligid han karsada.
Dugang pa han imbestigasyon, nakasagi gihapon an minivan hin biktima usa nga 43-anyos nga nagbabaktas ha ligid han karsada.
Nakag-angkon naman an driver hin mga bun-og ha iya lawas ngan presente nga naka-admit ha ospital, samtang
Dayon naman nga nagkasabot an tulo nga kampo, an tag-iya han panimalay magin an tag-iya han tricycle nga nakaparada ngan an driver, nga babatunon hine an tanan nga kagarastusan ngan danyos ha natabo nga insidente.
Umabuyon naman an tag-iya han tricycle magin an tag-iya han panimalay ngan dire na an mga ine magpapasaka hin kaso.
