Igin undang han Moro Islamic Liberation Front (MILF) an proseso han decommissioning han ira mga armed fighters yana nga semana mahitungod ha daw dire pagtuman han gobyerno ha mga kasabutan ha ilarom han 2014 Comprehensive Agreement on the Bangsamoro (CAB).
Subay ha MILF, P100,000 la an naihatag ha kada combatant hine, ngan waray na daw iba pa nga suporta nga nakarawat tikang ha gobyerno.
Pero dayun naman ine nga gindiwara han Office for the Presidential Adviser on Peace Reconciliation and Unity (OPAPRU).
Sumala kan Presidential Assistant David Diciano, dire dapat ig pokus an istoryahon ha aspeto nga pan-ekonomiya la mahitungod nga haluag an sakop han nasabi nga kasabutan.
Pag-eksplikar pa han OPAPRU, an Socioeconomic Package Framework para ha mga MILF combatant in naaprubahan la dida han Pebrero 2024, pero mayda na mga bulig nga naipatuman tikang pa han tuig-2015.
Kaupod hine an P100,000 transitional cash assistance kada combatant, enrollment ha PhilHealth, P4 billion nga pondo tikang han 2019 para ha iba pa nga suporta, skills training, emergency employment, ngan civil registration.
Mayda gihapon ginhahatag an gobyerno nga P50,000 kada tuig para ha mga istudyante han kada combatant nga naka-enroll ha kolehiyo.
Dugang pa ni Diciano, suportado gihapon han gobyerno an iginduduso han Bangsamoro para ha political autonomy. Pamatuod hine an pagkakatukod han Bangsamoro Autonomous Region in Muslim Mindanao (BARMM) ngan paghahatag hin kapas ha MILF kumo gobyerno han rehiyon.
