TACLOBAN CITY – Makakatagamtam hin tag 10,000 pesos nga ayuda tikang ha provincial government of Leyte an tanan nga mga buhi pa nga mga beterano nga nakigbisog para ha kagawasan han Pilipinas tikang ha pananakop han mga Hapones dida han gyera mondal dos.
Sumala kan Leyte Governor Leopoldo Dominico Petilla ha luyo han limitasyon ha pondo han lokal nga pamunuan han Leyte, tatalinguhaon han ira opisina nga maihatag ini nga pinansyal nga ayuda yana o kon ha masulod nga bulan.
Ginpoproseso na daw han provincial social welfare office an mga dokumento han mga world war II veterans ngan naghihimo na ini hin pamaagi kon pati-unan-o maihahatag an mao nga ayuda nga diri na kinahanglanon pa gumawas an mga ini ha ira mga panimalay ilabi na nga vulnerable an mga ini nga matapnan han COVID-19.
Sumala naman ha datos han Philipppine Veterans Affair Office (PVAO ) mayda pa nabibilin nga 92 nga mga World War II veterans ha Sinirangan Bisayas kon diin 50 han mga ini in taga Leyte, 21 an taga Samar, 13 an nag uukoy ha Biliran, ngan walo naman ha Southern Leyte.
Mababaruan nga nagin highlight ha pagsalin-urog han 76th Leyte Gulf Landing anniversary dida han nakalabay nga Martes,Oktubre 20 an pagkilala ha kaisog han mga World War II (WWII) heroes.
