TACLOBAN CITY – Ginsigurado han Department of Public Works and Highways (DPWH) nga tatagan hin prayoridad han gobyerno an mga importante nga road projects an Samar, Northern Samar, ngan Eastern Samar kumo kaparte han pagpapakusog hiton koneksyon ha transportasyon, ekonomiya, ngan seguridad ha Rehiyon 8.
Sumala kan DPWH Secretary Vince Dizon, nga kaupod ha mga pangunahon nga plano in an paghihimo ngan pagpapaupay han mga driving lanes ngan iba pa nga priority roads nga magkokonektar han tulo nga probinsya han Samar.
Dugang hini nga maiha na nga nakaplano an mga proyekto pero waray dayon katikangi mahitungod ha kakulangan ha pondo.
Kaupod gihapon ha tatagan prayoridad in an road connection tikang ha Eastern Samar tikadto ha Basay kun diin ginbabana-bana nga aada ha 8 ka-kilometro nala an nabibilin nga parte nga kinahanglan humanon.
Labot la ha pagpapaupay han transportasyon, ginpahayag han DPWH nga importante gihapon ini nga mga proyekto ha kampanya han gobyerno kontra ha insurhensiya.
Aminado naman an ahensya nga dire mahuhuman an ngatanan nga proyekto ha sakob hiton usa kutob duha ka-tuig.
Mahitungod hini, plano han gobyerno nga ig-programa an mga ini pinaagi han multi-year appropriation nga puydi mag-iha hin kutob 5 ka-tuig.
Samtang, nakatalaan nga titikangan an full rehabilitation han Maharlika Highway ha butnga hiton Abril kutob syahan nga parte hiton Mayo, nga igpapatuman han usa nga Quadruple A Contractor.
